Gottlob Frege

Friedrich Ludwig Gottlob Frege (pelapalan Dèt: [ˈɡɔtloːp ˈfreːɡə]) (hurup Arab botak: فريدريك لودويك ڠاوتلب فريڬي) ( 8 November 1848 – Juli 1925 ) ntu dia jago èlmu itung-itung, jago mantèk, ama atu orang pilsup basa nyang bekèn di ujung taon 1800-an ama awal 1900-an, lebi-lebi dia juga ikut ngebikin pilsapat perèksaan di awal 1900-an. Frege brojol di Wismar pas taon 1848, terus mati di Bad Kleinen pas taon 1925. Frege awalnya gawe jadi tukang mikir di Departemen èlmu itung-itung di Uniwersitèt Jena deri taon 1874 ampè 1918.^[1] Frege ada ngasi paham anyaran nyang hèbat banget di mantèk. ^[2]

Gawe

Frege ntu orang kesohoran nyang bikin gede pilsapat perèksaan basa. Gaweannya nyang bekèn ntu dia ada bikin dasaran bakal èlmu itung-itung liwat mantèk, ada juga pilsapat nahwunya nyang rapi, ama gaweannya soalan ma'na ama ruju'an. Gaweannya nyang kesohor ntu ada Begriffsschrift (Betawi: Tulisan Konsep) (1879), Die Grundlagen der Arithmetik (Betawi: Pondasi Itung-Itung)(1884), Grundgesetze der Arithmetik (Betawi: Wèt Dasar Itung-Itung)(1889; 1903), ama Uber Sinn und Beudetung (Betawi: Perkara Ma'na ama Ruju'an) (1892).

Ma'na ama Ruju'an

Uber Sinn und Beudetung (Inggris: On Sense and Reference; Betawi: Perkara Ma'na ama Ruju'an) ntu Frege punya malakah nyang dikeja deri konsep awak-kendiri nyang ada dalem atu setilah nyang dia ntu keiket ama pungsi kebeneran deri atu ongsongan. Ni kejaan nuju dia punya ruju'an ma'na soalan angka ama pegimana ntu orang bisa tau soalan angka.

Uber Sinn und Beudetung ngasi liat cara anyaran bakal cara perèksa basa ama sambungan deri basa ama mantèk. Frege ngebedain dua macem ma'na: ntu ma'na ama ruju'an. ma'na ntu jembrengan nyang ada di pikiran lu-lu pada—adanye di kepala—deri penauan soal basa, kalo ruju'an kendiri ntu sambungan deri apa nyang nyerocos ama banda senyatenya; banda wujud.

Frege ada ngasi tulad di Uber Sinn und Beudetung, dia ngasi jembrengan bedanya bintang pajar ama bintang ider Jorah. Dua-duanya punya ma'na nyang laèn tapi nyang jadi ruju'annya sama, ntu bintang ider Jorah. apa nyang wujud di pala deri bintang pajar, laen deri apa nyang wujud di pala deri bitang ider Jorah, bisa jadi deri kapan wayah ntu muncul bintang pajar ato soalan laèn nyang nyambung ama perintilan bintang pajar ama bintang ider Jorah nyang ngebikin dua-duanya laèn wujud dalem kepala.

Cerocosan bisa punye ma'na biar kata dia kaga' ada ruju'an wujudnya acan. Misalnya unicorn, peri, dan pegasi kaga' ada ruju'an wujudnya barang. Frege nganggep ni-ni cerocosan nyang kaga' ada ruju'an wujudnya barang kaga' ada nilai benernya, soalnya kaga' ada kuasè mantèknya acan. "Angka paling gede" bisa wujud di pala, orang tau maksudnya apa, tapi kaga' bisa diberi bener apa salah—soalnya kaga' ada nyang bisa ditunjuk bakal jadi ruju'an wujudnya. Frege nimbang-nimbang lagi, mikir-mikir dia soalan ruju'an setilah nyang nunjuk ke atu banda nyang kaga' ada ruju'an bandanya acan, dah gitu kaga' bisa dikasi bener apa salah liwat mantèk. Abis ntu Frege kasi timbang soalan bener-salah belah perintilan, bagian, deri ongsongan ama bener-salah ongsongan bulet-bulet,

"Barang sesiapa jang tidak kasih anggap itoe roedjoe'an ada, tidak dapat dia nèken atawa kasih tahan itoe setilah poenja predikat. Tetapi, dalem itoe perkara, bakal berlebih kiranja boeat pindah ke roedjoe'an nama; sesiapa orang bisa poeas dengan ma'nanja, kaloe ia tidak mahoe melangkah lebih jaoeh deri "pikiran" sahadja. Kaloe ini hanja perkara ma'na kalimat, jaitoe pikiran, maka tidaklah perloe repot-repot dengan roedjoe'an sebahagian kalimat; ma'na sadja, boekannja roedjoe'an, deri bahagian itoe jang sesuai dengan ma'na seloeroeh kalimat boelat-boelat."^[3]

Abis ntu Frege ada kasi usul buat konsep ruju'an ongsongan bulet-bulet soalnya nimbang-nimbang juga dia soalan bener-salah. Nimbang-nimbang ongsongan ni terus dikasi ke tu ongsongan punya bener-salah nyang ngebikin ongsongan bisa dipahamin—punya ma'na. Ni juga nyiratin kemungkinan bener-salah sebage kunci deri paham ngga'nya atu ongsongan, dengan ntu, ongsongan nyang bener mulu (tautologis) ato nyang sale mulu (kontradiksi) kaga' punya ma'na.^[3]

Abis tu ongsongan-ongsongan pada punye ma'na deri bener-salenya, nyang mesti ditanyain, ntu dia, apa bener-salah deri atu ongsongan ni nyambung ama ongsongan laèn nyang punya sambungan awak-kendiri ama ongsongan nyang punya ruju'an nyang sama. Ni dia terusan nyang jadi cara bakal kasi tau soalan awak-kendiri, nya'entu kalo setilah dalem ongsongan bisa dituker ama setilah nyang punye bener-salah nyang sama—punya ruju'an nyang sama;

a = b;
kalo, cuma kalo, a ama b nunjuk ke bener-salah yang sama pas dipaké dalem ongsongan.

Gawean Frege soalan ma'na ama ruju'an juga sambungannya ama mantèk ntu bikin jalan baru bakal pilsapat, nya'entu, dia ada kasi susuran konsep liwat perèksaan basa nyang nyambung ama bener-salah ntu basa—pengkolan basa. Wayah gini, seabrek jago pilsapat setuju ama Frege punya gawe, ntu-ntu dia ada Bertrand Russell ama Ludwig Wittgenstein. Abis Wittgenstein punya gawe, perèksaan basa punya kiblat laèn deri nyang dikasi Frege, susuran sambungan basa ama mantèk dilanjutin ama terdisi ajaran-positivis-anyar, terusannya pereksaan laèn muncul nya'entu soalan sambungan basa pas dipaké orang.

Ruju'an

↑ Martinich, A. P., & Sosa, D. (2001). A Companion to Analytic Philosophy (A. P. Martinich & S. David, Eds.). Blackwell Publisher Inc.
↑ (Indonesia) Bryan Magee. 2001. The Story of Philosophy. Jogjakarta: Kanisius
↑ ^a ^b Frege, G. (1948). "Sense and Reference". Source: The Philosophical Review, Vol. 57 (3), hal. 209-230.

[:0-1] Martinich, A. P., & Sosa, D. (2001). A Companion to Analytic Philosophy (A. P. Martinich & S. David, Eds.). Blackwell Publisher Inc.

[Story-2] (Indonesia) Bryan Magee. 2001. The Story of Philosophy. Jogjakarta: Kanisius

[:1-3] Frege, G. (1948). "Sense and Reference". Source: The Philosophical Review, Vol. 57 (3), hal. 209-230.

[1]

[2]

[3]