Cucut tokè'

Cucut Tokè' nyang resep di dasar laot

Cucut Tokè' entu hiu tokè atawa cucut kembang, nama latinnya Stegostoma fasciatum, enih macam keitung cucut nyang demen ngendon di jero laut; die doang nih atu-atunya macam nyang masuk ke jero suku Stegostomatidae ama marga Stegostoma. Ntu cucut kalo’ malam baru dah kelayapan (nokturnal), kaga' bahaya juga, nyebar, da, tuh di laotan Indo-Pasifik, mulai dari pinggir laot Aprika wetan ampe ke Nusantara trus ke Pasifik.

Ni' binatang kalo’masi cemen, panjangnya kurang lebi semeteranlah (90 senti), biyasanya warnanya belang-bentong kayak jebra, makanya ada juga’ nyang nyebut die cucut jebra (basa Inggrisnya Zebra Shark). Tapi kalu udah gedean, gambar warnanya uda beda jau; garis-garisnya entu beroba jadi bulet-bulet kaya’ macan totol. Di Ostrali, ni cucut juga dikasi nama Leopard Shark Nah nama entuh di Samudra Pasifik bagian wetan Amrik Lor malah dipaké jenis cucut laèn, Triakis semifasciata. Kalo’ nelayan di Indonesia bagian barat mah kenalnya dia cucut tokek atawa cucut totol mungkin lantaran bulet-bulet di badannya ntu ngeingetin ama gambar warnanya tokek atawa kembang tertentu."

Ciri Kas Cucut Tokè

Nah, kalo uda gede nih cucut tokè' warnanya jadi bintik-bintik kaya macan tutul, trus ada garis-garis panjang nonjol di punggungnya.

Ukuran awaknya mah sedeng aja, bisa nyampe 2,5 meteran (sekitar 8,2 kaki), tapi ada juga' nyang bilang bisa nyampe 3,5 meteran (11,5 kaki). Awaknya bulet panjang, kepalanya gedean dikit tapi agak pipih, moncongnya pendek tumpul. Di punggungnya ada lima garis panjang nyang nonjol; terus sirip buntutnya kaga' ke atas, malah manjang ke belakang, ampe-ampe ampir separo panjang awaknya.

Matanya cemen banget, letaknya di samping kepala. Lobang insangnya ada lima biji, nyang tiga di belakang letaknya di atas pangkal sirip dadanya; nah, nyang nomer empat ama lima mah deketan letaknya. Di tiap idungnya ada kumisnya, trus ada cela nyang ngehubungin idung ama mulutnya.

Begini nih ceritanya kalo cucut tokè' masi cemen. Awaknya tuh coklat gelap, trus di punggungnya ada belang-bentong kuning. Nah, bagian bawah perutnya mah warnanya kuning muda.

Trus, pas nih cucut cemen uda mulai gedean, kira-kira panjangnya udah antara 50 sampe 90 sentimeter, warnanya langsung beroba. Belang-belang kuningnya ilang, gantinya jadi bintik-bintik item di atas warna dasarnya nyang jadi terang pucet. Jadi, beda banget dah penampilannya pas masih cemen ama udah gede.

Na, kalo soal lingkungannya ni cucut tokè, die nyebar luas di laotan Indo-Pasifik. Mulai dari Aprika Kidul di belah Kulon Laut Merah, ama Teluk Persi (termasuk juga perairan Madagaskar ama Maladewa). Trus ke Wetan lagi, ngelewatin India ama Asia Kidul Wetan (termasuk perairan di Indonesia, Filipina, ama Palau). Ke Lor juga ada, ampe Taiwan sama Jepang. Abis itu ke Wetan lagi, ampe Kaledonia Baru ama Tonga di bagian Lor, terus Ostrali Lor di bagian Kidul Jadi, lumayan jau dah tempat nongkrongnya nih cucut.

Habitat & Kebiasaan

Nih cucut tokek idupnya di jero laot, dari mulai tempat nyang kena aer pasang surut ampe kedalaman sekitar 62 meteran di wilayah paparan benua sama laot-laot deket pantai. Kalo uda gedean dikit, demennya nongkrong di terumbu karang, tempat pasir, sama bebatuan. Malahan, ada laporan dari Filipina katanya pernah ditemuin di aer tawar juga'.

Kadang-kadang nih cucut tokè' suka jalan-jalan jau di laotan, nyamperin gunung-gunung di jero laot nyang jauh dari mana-mana. Pernah kecatet ada nyang jalan ampe 140 kilometer jaunya. Tapi, dari penelitian mah ketauan kalo jarang banget ada tuker-tukeran genetik di antara kelompok cucut ni.

Cara berenangnya tuh kayak belut, melèyot-lèyot gitu.

Kalo siang hari, nih cucut jalannya pelan banget, seringnya diem aje di dasar laot. Sirip dadanya dipake buat nahan awak bagian depannya, jadi kepalanya ngadep ke arah aer dateng biar gampang napas. Tempat kesukaannya mah di sela-sela karang, nyang arusnya lebih kenceng terus banyak oksigennya. Nah, kalo malem atawa pas banyak makanan, baru dah die gercep. Cucut tokè' mah perenang nyang kuat lagi lincah, gerakin awak ama buntutnya kaya' belut.

Makanan utamanya mah kerang-kerangan; tapi kalo ada udang-udangan, ikan cemen, apa lagi uler laot mah tetep disikat juga. Badannya nyang langsing terus lentur bikin die bisa masuk ke lubang-lubang kecil trus nyelusup di antara karang buat nyari makan. Congornya juga kuat ototnya, jadi bisa nyedot mangsanya nyang ngumpet di dalem lubang karang.

Pemanfaatan oleh manusia

Nih cucut tokè'atawa cucut kembang mah binatangnya lelet terus anteng, jadi kaga' bahaya dan gampang dideketin sama penyelam. Tapi ya, jangan macem-macem juga, die bisa ngegigit kalo buntutnya ditarik-tarik atawa awaknya dijadiin tunggangan. Cuma ada satu kejadian nyerang tanpa sebab, itu juga udah lama, taun 2008.

Cucut tokè' ni jadi daya tarik buat turis nyang demen liat jero laut di banyak tempat die tinggal: di Laot Merah, di Maladewa, di Thailand, di Great Barrier Reef, sama tempat laen-laen. Banyak cucut tokè' nyang udah biasa ama manusia, apalagi di tempat wisata selam, mau nerima makanan dari tangan penyelam, terus dibiarin dipegang-pegang juga. Nih cucut juga gampang banget idup di dalem tangki, makanya banyak akuarium di dunia nyang majang nih ikan. cucut cemennya juga', lantaran warnanya cakep, sering ditangkep terus dijual buat ngisi akuarium pribadi; padahal mah ntar juga gedenya kelewat gede buat akuarium rumahan.

Cucut tokè' juga sering ditangkepin sama nelayan di banyak tempat die tinggal. Biasanya ditangkep pake pukat dasar, jaring insang, atawa pancing. Dagingnya dijual seger atawa diasinin buat dimakan. Minyak dari hatinya dipake buat vitamin, siripnya dijual buat bahan sop, terus jeroannya buat campuran pakan ternak.

Nih yu gampang banget dah populasinya nurun di suatu tempat, soalnya die demennya di tempat nyang dangkal terus jarang pindah-pindah tempat. Dari penelitian pasar juga keliatan kalo tangkepan nih cucut udah jauh berkurang dibanding dulu. Cucut tokek juga kena ancem gara-gara terumbu karang pada rusak dibikin bangunan, sama gara-gara nangkap ikan karang pake cara nyang ngerusak kayak dibom ama diracun. Makanya, badan konservasi dunia IUCN bilang status populasinya Rentan (Vulnerable); kecuali nyang di Australia mah katanya masih aman.