Cucut bantèng
_(Ifremer_00813-92510_-_53588).jpg)
Cucut bantèng (atawa nama latènnya entu Carcharhinus leucas) nya’entu atu macem ikan Cucut nyang keitung ke dalem atu keluarga Cucut-cucutan Carcharhinidae. Ni jenis ikan kesohor ama nama bull shark.[1] Cucut bantèng juga’ ada punya nama poyokan di mari Indonésia, kaya’ Cucut buas, cucut bekeman (kalo di Jawa), ama Cucut bujit (kalo di Kalimantan). Nah, kalo nama latèn buat Cucut bantèng entu Carcharhinus leucas. Ni nama ditetapin ama si bule nyang namanya Müller ama Henle taun 1839.[2]
Gambaran soal cucut bantèng
[permak | permak sumber]Cucut bantèng keitung jenis Cucut nyang awaknya gedé. Awaknya keliatan gemuk ama keker. Pas baru berojol, panjang awaknya bangsa 55 cm. Nah, kalo uda gedé, panjang awalnya ga’ ngarti lagi, dah. Umumnya, panjang awak Cucut bantèng nyang uda gedé bangsa 200 ampé 220 cm. Kalo cucut banténg lanang, dibilang uda gedé kalo panjang awaknya antara 197 ampé 226 cm. Terus, Cucut bantèng wadon dikata uda gedé kalo panjang awaknya antara 180 ampé 230 cm. Tapi, ada juga’, tuh, Cucut bantèng nyang panjangnya ampé 340 cm, ditemuinnya di Atlantik Lor.[3][4][5][6]
Geger cucut bantèng warnanya abu-abu, nah, kalo entu perutnya, mah, pucet. Tinggi sirip geger nyang pertama bisa ampé tiga kali tinggi sirip geger nyang kedua. Panjang awak cucut bantèng, mah, bangsa 60 ampé 400 cm. Moncongnya entu cucut bantèng bulet lèbar terus pèndèk banget. Jarak dari ujung moncong ke mulut lebi pèndèk dari jarak antara lobang idungnya.[4]
Tempat tinggal cucut bantèng
[permak | permak sumber]Cucut bantèng bisa ditemuin di peraèran pinggir panté di benua Aprika, Asia, Amrik, ama Ostrali. Di saben benua, ni cucut tongkrongannya di peraèran panté nyang iklimnya tropis ama subtropis.[7] Tapi, jarang banget, dah, ditemuin di laot dalem. Kalo di Indonésia, mah, ampir di semua peraèran ada cucut bantèng.[1]
Kalo di peraèran panté, cucut bantèng entu biasanya ada di daèrah ombak ampé kedaleman 150 mèter ke dalem laot. Ni cucut keitung macem nyang demen banget ama atu-atu tempat. Soalnya, entu tempat penting buat nyari makan ama nyumput. Entu tempat juga’ dibutuin buat selawar-seliwer (migrasi).[8] Cucut bantèng juga’ ada punya jalan kendiri buat begusar-gèsèr.[9] Daèrah kuasanya bisa nyampé peraèran nyang aèrnya tawar. Ni macem cucut nyebar di peraèran nyang anget, di moara kali, ama di sètu nyang aèrnya payo, kedalemannya bangsa 1 ampé 152 mèter.[10] Entu tempat tinggalnya ada di moara kali Swan.[4]
Abet
[permak | permak sumber]Panganan
[permak | permak sumber]Cucut bantèng, tuh, ngandelin bau bakal nyari mangsa. Ni Cucut keitung pemangsa nyang galak, demen banget ama bau mokla. Panganan utamanya ikan-ikan nyang gedé ama binatang nètè’ laot.[7] Macem-macem mangsanya ada pari, penyu, singa laot, lumba-lumba, Ampé-ampé Cucut dari laèn macem juga’ dia embat. Selaèn entu, Cucut bantèng juga’ keitung macem Cucut nyang ujug-ujug bisa nyerang manusia, kaga’ paké petèntèng aling-aling. Malahan, kasus penyerangan Cucut bantèng bakal manusia paling banyak dibandingin ama cucut nyeng laèn macem.
Tempat beranak
[permak | permak sumber]Cucut bantèng, tuh, keitung macem cucut nyang setia ama tempat buat beranak. Jadi, kalo uda mau kawin bakal beranak, dia bakal balik lagi terus ke tempat nyang sama kaya’ dia ngembangin anak duluannya. Tempat nyang penting buat Cucut bantèng beranak entunya di peraèran Piji. Macem-macem tempatnya ada di Kali Rèwa, Kali Nawua, Kali Sigatoka, ama Kali Ba.[11]
Ruju'an
[permak | permak sumber]- ↑ a b Compagno, L.J.V. (1984). FAO species catalogue. Vol. 4. Sharks of the world. An annotated and illustrated catalogue of shark species known to date. Part 2 - Carcharhiniformes. 1 FAO Fisheries Synopsis. No. 125. Vol. 4, Pt. 2. Rome: FAO. pp. 251-655.
- ↑ White, W. T., Last, P. R., Stevens, J. D., Yearsley, G. K., Fahmi, & Dharmadi. (2006). Fishes of the Indonesian Seas. CSIRO Publishing. p. 133.
- ↑ Pillans, R. D., Stevens, J. D., & Last, P. R. (2008). Australian Sharks and Rays. CSIRO Publishing.
- ↑ a b c Last, P. R., & Stevens, J. D. (2009). Sharks and Rays of Australia (Second ed.). CSIRO Publishing.
- ↑ Simpfendorfer, C. A., & Wiley, T. R. (2005). Population parameters of the bull shark (Carcharhinus leucas) from the east coast of Australia. Marine and Freshwater Research, 56(5), 671-677.
- ↑ Huveneers, C., Simpfendorfer, C. A., Kajiura, S. M., & Sumpton, W. D. (2013). Residency and movement patterns of the bull shark Carcharhinus leucas in a subtropical estuary. Marine Ecology Progress Series, 484, 185-200.
- ↑ a b Dudley, S. F. J. (2004). Shark attacks in southern Africa and their prevention. University of Natal Press.
- ↑ Heupel, M. R., Semmens, J. M., & Hobday, A. J. (2007). Automated acoustic tracking of aquatic animals: technology and applications. Reviews in Fish Biology and Fisheries, 17(1), 1-13.
- ↑ Cliff, G., Dudley, S. F. J., & составом рабочей группы по акулам. (2011). Отчет о состоянии исследований акул в Южной Африке. Oceanographic Research Institute.
- ↑ Thorson, T. B., Cowan, C. M., & Watson, D. E. (1973). Body fluid solutes of juveniles and adults of the euryhaline bull shark Carcharhinus leucas from fresh water and saline environments. 1 Comparative Biochemistry and Physiology Part A: Physiology, 46(1), 29-43.
- ↑ признано на основании анализа литературных данных.