Cikarang
Cikarang (Arab gundul: چيكارڠ) entu ibunegrinyah Kabupatèn Bekasih. Kota Cikarang gutekanah tuh kebagi jadi lima kecamatan, kecamatan Cikarang elor, Cikarang wétan, Cikarang kulon, Cikarang kidul, ama Cikarang puser. Kota Cikarang ngétanin tuh nenangga ama kecamatan Kedungwaringin ama Kabupatèn Kerawang, terus gè nenangga ama kecamatan Sérang Baru ama Bojongmangu di bekidul, terus bekulon bebatesan ama kecamatan Cibitung, Sétu, ongkoh beelorah mah nenangga ama kecamatan Sukatani ama kecamatan Karangbahagia.
Kota Cikarang tèh diliwatin seberiji kali kayak kali Cikarang, Cipamingkis, Cisadang, Cikedokan, Cibéèt, ama Cihérang nyang ulunyah ada di tanah tinggi Jonggol di lebah wétan Kabupatèn Bogor. Kota Cikarang gableg hatu gutekan nyang namanyah Jababeka, nyang jadi gutekan industri paling gedè di Asia Tenggara.
Riwayat
[permak | permak sumber]Nama
[permak | permak sumber]Asal mulanyah nama Cikarang tuh dari nama atu kali nyang ngeliwatin daérah inih, nyang namanyah kali Cikarang. Nama entu kali déwèk gé asalah dari basa Sunda, "ci" atawa "cai" artinyah "aèr", ama "karang" nyang namanyah bolèh dapet dari gunung Karang nyang ada di désa Cibodas, Jonggol.
Pemegaran
[permak | permak sumber]Sebelonan dia jadi ibunegri Kabupatèn Bekasih ama kota industri, Cikarang mulanyah cuman sebiji kecamatan nyang gutekanah cuman daérah Cikarang Elor doangan. Mulain pada 1992, Cikarang dilegain bakal dijadiin kota Industri di Kabupatèn Bekasih. Kota Cikarang gutekanah dimegarin makè nyaplokin daérah-daérah diseputeranah, ongkoh entu tempat-tempat baru dinamain makè nama nomenklatur Cikarang. Kayak misal kecamatan Lemahabang dirubah namanyah jadi Cikarang Wétan, sabariji désa di Cibitung ama Sétu disatuin jadi kecamatan Cikarang Kulon, terus sabariji désa di Sérang Baru dijadiin kecamatan Cikarang Kidul, ama ongkoh Cikarang Puser nyaplok daérah Lemahabang, Kedungwaringin ama Cibarusah.
Kota Cikarang nyang ini ari udah ngablak begitu tuh dulunyah gutekan aslinyah ora segonoh. Daérah nyang dulu aslinyah disebut Cikarang masing bisa diliat di kecamatan Cikarang Elor ampè sekarang, misalah pasar ama tapsion keréta di daérah nyang disebut "Cikarang Lama" ama atu kelurahan namanyah "Cikarang Kota".
Penduduk
[permak | permak sumber]Suku ama Basa di Cikarang
[permak | permak sumber]Kota Cikarang didiemin ama suku Betawi di lebah elor ama kulon, kalu lebah wétan ama kidulah mah didiemin ama suku Sunda. Kota Cikarang jadi batian dimana orang-orang, basa, ama budaya Sunda ama Betawi pada nyampur.
Ruju'an
[permak | permak sumber]1. Ariefana, Pebriansyah (2021-09-21). "Sejarah Cikarang, Kini Jadi Kota Industri Terbesar se-Asia Tenggara". Suara.com: https://bekaci.suara.com/read/2021/09/27/161025/sejarah-cikarang-kini-jadi-kota-industri-terbesar-se-asia-tenggara Diakses tanggal 2025-01-22.