Carok

Carok yaentu matiin orang nyang dilakuin ama masyarakat Madura buat ngejaga harga diri pas dilecehin ama orang laen. Penyebab utamanya biasanya gara-gara bini digangguin orang atawa sengketa tanah ama sumber daya alam. Carok ada dua caranya, yaitu ngonggai ama nyelep. Senjata nyang dipake cuma sebiji, ya ntu celurit. Syarat kalo mau Carok entu musti punya kadigdajan (kesaktian), tampeng sereng (mental berani), ama banda (duit/harta).

Penyebab

Buat orang Madura, kalo bini atawa anak dilecehin entu bener-bener bikin malu laki ama keluarganya. Orang Madura nganggep bini entu bagian dari kehormatan laki, dadi kalo diganggu dikit aja, itu mah namanya nyari mampus. Salah satu prinsip idup orang Madura entu ngebales perbuatan orang musti pas ama apa nyang dia terima. Kalo ada anggota keluarga nyang dibunuh, keluarganya bakal ngebales pake cara nyang sama juga. Nyang menang Carok biasanya nyimpen baju ama senjata lawannya, trus dikasih ke anak atawa kerabat si korban. Tujuannya biar entar ada nyang bales dendam. Mangkanya, Carok ni dadi urusan nyang turun-temurun. Kalo urusan sengketa, Carok dadi jalan paling akir buat nyelesein masalah. Biasanya dimuswarahin dulu biar damai, tapi kalo kagak ketemu titik temunya, baru deh Carok jalan.

Prosedur

Carok dimulain dari berantemnya dua laki gara-gara martabat bini (atawa mantan bini), tanah air, atawa agama. Awalnya musti lewat jalan mediasi dulu. Kalo mediasi atawa musyawarah kagak mempan, baru deh mereka milih jalan Carok.

Dua orang nyang mau duel ni musti berguru dulu buat nyiapin diri. Mereka juga kudu minta izin ama restu dari orang tua ama keluarga.

Kalo waktunya udah ditentuin, mereka bikin janji. Duelnya dilakuin di depan keluarga, tokoh masyarakat, ama warga. Ada aturannya juga, kagak boleh nyerang dari belakang bân musti satu lawan satu. Nyang kalah atawa menang musti nerima, trus kagak boleh ada dendam lagi. Masalahnya musti kelar di situ juga.