Candi Arjuna
Candi Arjuna nya'entu atu gedong candi Hindu nyeng ngejogrog di Dataran Tinggi Dièng, Kabupatèn Banjarnegara, Jawa Tenga, Indonésia .
Candi Arjuna nya'entu salah atu gedong candi di Komplek Candi Arjuna, Dieng. Candi Arjuna dianggep jadi candi paling kolot èn dibikin wayah abad ke-8 Maséhi ama Dinasti Sanjaya deri Mataram Kuno. Enni komplèk gè' temasup Candi Semar, Candi Srikandi, Candi Puntadéwa, ama Candi Sembadra. Candi Arjuna adanya di lebah paling ilir deri laèn-laèn candi di entu komplèk. Candi Semar entu candi nemenin, atawa ngelengkapin candi Arjuna. Dua gedong entu candi tuh adep-adepan.
Kaya' kebanyakan candi di Dièng, orang-orang situ ngasih nama entu candi tuh deri atu penggedé deri pegelaran wayang Mahabharata. Selaèn entu, entu tempat tuh jadi tuan rumah Dieng Culture Festival ongkoh.[1]
Tampang
[permak | permak sumber]Candi Arjuna entu dibikin ngeja ngadep ngulon, ama ada tangga nyang ngarah ke pintu masupnya di bekulon ongkoh. Ada delapan tangga nyeng ngarah ke pintu candi, nyang pinggirannya dihiasin penil ama ujungnya ada pala naganya. Entu pintu candi punya atu pangkèng bangsa atu mèteran mah lega'nya. Ada ongkoh pajangan kalamakara di atas lawang pintu entu. Entu candi atepnya munjung tinggi lancip kaya' kamprahnya modèlan rumah limasan.[2]
Pemiaraan èn Pemangpaatan
[permak | permak sumber]Segutekan candi entu romannya kurang dijagain bener-bener. Tanah di entu segutekan candi udah lama dipaké orang-orang bakal melak kentang, sayuran, ama kembang-kembangan.
Wayah gini, pelancong nyang dateng ke candi Arjuna atawa laèn-laèn candi kaga' bakal nemuin patung nyang kamprahnya ngejogrog di dalem candi. Entu patung-patung kebanyakan udah ditaro di Musium Kailasa.
Lumbrahnya, pelancong nyeng dateng bakal dikasih kaèn biar keciri kalu entu orang tuh pelancong, orang-orang bakal makénya entu dilibedin di pinggang. Kaènnya entu dibagiin ama dibalikin lagi di pintu masup ama pintu kuar. [3]
Semprakan taon 2010, komplèk Candi Arjuna udah dipaké bakal ngembangin tempat pelesiran, nyang diopènin ama Kantor Pariwisata Banjarnegara èn Enclekan Kesadaran Pariwisata ( Pokdarwis ). Enni keriaan tuh digero Festival Budaya Dieng. Ada juga' laèn-laèn acara taonan nyang diadain barengan ama enni keriaan nya'entu Jazz Atas Awan. [4]
Poto
[permak | permak sumber]
Candi Arjuna ama Candi Semar berèndèng.
Tampang depan.
Dingding candi nyeng lebah ada lobangnya.
Batu Tulis Dièng 731 Saka (809 M), sekarang ditaro di Musium Nasional (inv. no. D.57)
Paranan
[permak | permak sumber]- ↑ Nurlaili, Aulia Putri (2021-09-29). "15 Tempat Wisata di Banjarnegara Jawa Tengah, Nomor 6 Konon Bisa Bikin Awet Muda". iNews.ID (dalem basa Indonésia). Dipungut 2023-10-01.
- ↑ "Sejarah Candi Arjuna Dieng Wonosobo (Jawa Tengah)". Dipungut 15 Maret 2019.
- ↑ Platour, Dieng; CV. "Wisata Candi Arjuna Dieng - Paket Wisata Dieng Terbaik" (dalem basa American English). Dipungut 2025-02-23.
- ↑ "Candi Arjuna, Pesona Mahakarya Mataram Kuno di Dataran Tinggi Dieng". Dipungut 15 Maret 2019.