Cètrok

Cètrok ya'entu atu makanan Betawi nyang kamprahnya ada di daérah Bekasi atawa Cikarang. Enni entu makanan nyang kebikin deri sayur-sayuran ama dipakéin bumbu kacang. Cètrok enni biasanya jadi lau' nasi atawa digado kalu dipakéin lontong. Enni makanan tuh sebenernya atu rupa ama Betawi punya gado-gado atawa Sunda punya lotèk cuman ora percis-percis bangat.

Bedanya ama gado-gado

Émang enni makanan tuh kalu uda nembrak di piring mah ora ketara lagi entu kalu dia sebenernya béda rupa ama Betawi punya gado-gado atawa Sunda punya lotèk. Cètrok gé maké sayuran-sayuran boléh ngerebus. Cuman, bédanya cètrok maké rupa-rupa sayuran nyang lebih dikitan ketimbang gado-gado ama loték alatan cètrok mah maké bahan-bahan nyang boléh dapet seadanya doangan. Misalah kalu gado-gado mah segala maké jagung, paré, ama kentang, cuman cètrok mah ora. Gado-gado gé maké gorèng témpé ama gorèng tahu kamprahnya mah. Kalu cètrok, bolèh juga maké entu pada, kalu mao nyang paling komplit.

Bahan-bahan cètrok

Bahan-bahan bakal ngeja cètrok entu nyang kaya' ditulisin di bawah enni.

• Bahan isian: rebus ngkol, kacang panjang, ama labuh siem, togé', ama timun seger.
• Bumbu kacang: cabé ceplik, cabé keriting mérah, garem hatu tési ntèh baé, gula mérah atu biji ama separo, gorèng kacang nyang uda dialusin, aèr asem jawa, ama kentang rebus.
• Bahan tambahan: gorèng tahu, témpé, ama lontong kalo mao.
• Bahan pelengkap: kerupuk ama bawang gorèng.

Cara ngeja Cètrok

Enni cara bakal ngeja cètrok.

• Rebus dulu bahan-bahan sayuran selaèn timun. Timun mah dibagènin baé seger.
• Kalu mao maké témpé ama tahu, gorèng dulu dah témpé ama tahu ampé warnanya rada coklat. Tirisin minyakah terus cacag keja kotak-kotak sedeng.
• Sebelon ngeja bumbu kacang, siapin dulu entu aèr asem jawa. Seduh asem jawa maké aèr panas terus diaduk-aduk ampé nyampur rata.
• Bakal bumbu uleknya, grèndos dulu cabé ceplik ama garem duluan ampé rada alus. Cabénya seterah mao banyak apa kaga ngikut seléra baé dah doyan pedes apa ora. Kalu ora demen pedes, makénya ntong cabé ceplik rawit tapi maké cabe keriting mérah doangan baé dikit.
• Abis entu masupin dah gorèng kacang nyang bolèh digiling ama gula mérah. Entar berapa kali waktu liat-liat dulu kalu roman-romanah kekentelan entu bumbu kacang, tambahin kentang rebus bakal tambah ngalusin ama aèr asem jawa bakal tambah ngèncèrin.
• Masupin lontong nyang diiris-iris dadakan di atas entu coèt, kalu mao maké lontong mah.
• Masupin sayuran-sayuran nyang uda bolèh ngerebusin ama bangsa tahu témpé kalu ada. Terus tambahin timun seger nyang diiris-iris dadakan di atas entu coèt bumbu.
• Aduk-aduk entu kabèh bahan sambil rada diulek dikit bagèn nyampur bener jadi atu.
• Taro di daon atawa piring, tambahin bawang gorèng ama kerupuk.