Biji ketapang

Biji Ketapang nya'entu atu rupa bebandos nyeng dibikin deri sagu nyeng diaduk ama santen èn gula. Sekarang mah biji ketapang udah bolèh maké macem-macem bahan bakal dikejanya kaya' nyampurin terigu, telor, garem, ama panèli selaèn maké santen ama sagu doangan. Entar entu adonan digorèng dah. Enni kué entu bebandos aseli Kepuloan Serébu.

Asal-Usul Biji Ketapang

Biji ketapang entu atu bebandos kering terdisionil Indonésia, hususon daérah Betawi ama seputerannya. Bagèn kata ora ada seratan nyeng nandain kapan enni kué dulunya nongol, tapi enni kué emangnya udah jadi bebandos khas deri uyut ampé ke buyut.

Enni kué punya nama émang dicomot deri biji po'onan ketapang (Terminalia catappa), nyeng banyak tumbuh di daérah pinggiran bawah di Indonésia. Enni po'on ketapang punya biji bentukannya émang jadi conto bakal enni kué punya rupa, nya'entu bulet gèpèng ama rada dèplè.

Bahan-Bahan Biji Ketapang

Enni dia bahan-bahan bakalan ngeja kué biji ketapang tuh.

Tepung terigu
Kelapa nyeng udah boléh marut
gula putih
margarèn atawa blubèn
telor
santen kentel
garem
panèli
minyak gorèng (bakal ngegorèng)

Cara Ngeja Biji Ketapang

Kelapa parutnya disangré dulu ampé coklat. Kalu udah adem, bolèh digiling ampé alusan.
Maké baskom, kocok telor ama gula ampé entu gula melesep èn keja ampé dikit ngembang ama bebusa.
Tambain blubèn, santen, garem, ama panèli. Aduk-aduk dah ampé nyampur bener.
Pasupin terigu èn kelapa bolèh nyangré terus aduk maké cèntong atawa cemek-cemek baé paké tangan ampé rata èn kalis.
Comot dikit entu adonan, gulung-gulung keja lonjoran kecit ukuran 1 sèntian baé.
Tetek dah entu adonan maké piso atawa gunting keja nyèrong dikira-kira baé ukurannya.
Perulukin entu adonan maké terigu biar pada kaga nèmpèl.
Jerang minyak di kuali paké api sedeng baé.
Gronyos entu adonan nyeng udah bolèh netek ampé rada coklat warnanya. Ontong diaduk-aduk baé bagèn kaga ancur entu kué.
Angkat terus tirisin entu kué bolèh ngegorèng.
Ademin dulu, terus baru dah pasupin ke kéler.