Ba'wan

Ba'wan (hurup Arap gundul: بقون) nya'entu atu macem gorèngan nyeng ada di mana baé di Indonésia. Ba'wan punya laèn-laèn rupa ama nama di laèn daérah. Ba'wan entu biasanya bentukannya dèplè ama rasanya guri, kaga' manis. Ba'wan punya ba'an dasarnya entu adonan tepung. Biasanya adonan bakal ba'wan géh bisa dipaké bakal ngeja nggorèng gorèngan laènnya. Adonan ba'wan biasanya dibumbuin ama tumbar, daon bawang, ama dikasi kunyit bagèn warnanya cera'.

Asal mula ba'wan

Ba'wan entu asal katanya mah deri basa Tionghua nyeng arti benerannya entu "bola daging".

Macem-macem ba'wan

Di kampungan-kampungan Betawi ama daérah Sunda, ada berabiji rupa ba'wan nyang has kaya' gini:

Ba'wan atawa bala-bala, nya'entu ba'wan nyang paling nyohor. Enni ba'wan dikeja deri ngkol ama wortel nyang diirisin tipis-tipis.
Ba'wan jagung, nya'entu ba'wan nyeng isinya jagung bolé mipil. Ada juga nyeng nyebutnya perkedèl jagung kalu ngeja'nya rada bunderan.
Ba'wan jèngkol, nya'entu ba'wan nyeng isinya jèngkol bolé ngiris tipis-tipis.
Ba'wan teri, nya'entu ba'wan nyeng isinya teri kecit-kecit.
Ba'wan udang, nya'entu ba'wan nyeng isinya udang.
Ba'wan témpé, di tempat laèn disebutnya témpé tepung, laèn juga ama témpé mendoan nyang gedéan ama kaga dikeja gorèng garing.

Ba'wan di laèn-laèn tempat

Ba'wan, utamanya bala-bala, punya macem-macem nama di laèn-laèn daérah di Indonésia. Misalnya di Semarang enni gorèngan disebutnya pia-pia èn di Surabaya disebutnya oté-oté.