Bèntèng Tolukko
Bèntèng Tolukko entu, mah, bèntèng bolé Portugis punya peninggalan nyang adanya di Kerurahan Sangaji, Kecamatan Ternaté Ilir, Kota Ternaté, Maluku Ilir.[1] Bèntèng Tolukko dibikinnya taon 1522.[2] Ni bèntèng – Portugis nyang bolé mbikin bakal nggesu Belanda dari tu pulo.[3] Ni bèntèng, abisnya, dicidèk ama Belanda taon 1612 ama didangdanin lagi bangunannya ama si Pieter Both.[1] Taon 1864, ama Tuan Residèn P. van der Crab, ni benteng Tolukko disuru dikopongin bahnanya bagèan-bagèan bangunannya udah pada sempal ama bejad.[1] Gupernemèn Kiblik Indunisia puger lagi, dah, ni bèntèng taon 1996–1997.[2]
Sejarah
[permak | permak sumber]Kaya’ banyak bèntèng nyang ada di Ternaté, sanonya, Bèntèng Tolukko dikeja ama Portugis, nyang udah ampir nguasain ampir semua dagang rempah-rempah di sono abad ke-16. Ada kumendan tentara kapitèn Portugis nama Fransisco Serraow ngebangun ni bèntèng, nyang tadi’nya namanya Santo Lucas, bakal jadi pancernya pertahanan ama tempat nyengkep rempah-rempah boléan Ternaté nyang pada dia dagangin.
Ni bèntèng adanya di lèmpèngan nyang ènak tempatnya lantaran ke laot deket. Mana tu bèntèng adanya di bukit nyang tinggi, lagi, jadinya bakal mantengin apa-apa nyang ada di istana Kerajaan Ternaté, mah, gampil. Cuman, adanya jabanan dari ra’yat Ternaté punya lantaran nyang dipimpin ama Sultan Babullah, Portugis kèok tèklok di situ èn terus lepas, dah, tuh, cokolannya taon 1577. Wates tu ari, tu Bèntèng Santo Lucas dicokolinnya ama Kerajaan Ternaté ampé Belanda pada dateng nyang, entarannya, tu Belanda rambèt lagi tu bèntèng dari orang Ternaté, terus dia pada ganti tu bèntèng punya nama jadi Bèntèng Hollandia.
Ni bèntèng terus dipuger taon 1610, terus dikeja petahanan ama Ternaté bakal ngelawan Belanda. Terusannya, bedasar ama perjanjian kerja sama nyang ditèken ama Kumpeni ama Kerajaan Ternaté, taon 1661, Sultan Ternaté nama Mandar Sah diboléin nangkring di Bèntèng Hollandia ama dia punya pasukan 160 orang. Nama Tolukko masing dikaètin ama ni bèntèng ampé ni témpo, èn juga’ ada ceritanya nyang kaga’ kalah ngebèngbatnya. Ada cerita nyebutin kalo nama Tolukko dipaké témpo ada Sultan Ternaté, Kaicil Tolukko, merèntah barang taun 1692.
Sumber laèn bilang kalo entu nama Tolukko bolé ngucapnya orang situ pas ngomong Santo Lucas. Kalo kata ni cerita, orang-orang situ pada kaga’ menjes ngomong Santo Lucas-nya. Mangkanya, bilangnya pada Tolukko-Tolukko aja. Puguh, èmang, misi ada kekaga’puguhan pekara sejarahnya ni nama Tolukko. Tapi, entu, mah, pagon ketimbang ngomongin pentingnya peran ni bèntèng bakal Portugis, Belanda, lebi-lebi tu Kerajaan Ternaté kendiri.[4]
Jogrokan bangunan
[permak | permak sumber]Jaman dulu, Bèntèng Tolukko, mah, bekènnya Bèntèng Hollandia.[5] Bèntèng Tolukko dibangunnya di atas umpak-umpak batuan beku.[5] Ni bèntèng kebikin dari bastion tiga biji, gedong tanah, jojogan dalem, lorong, ama bangunan utama bentuknya pesagi empat.[5] Jogrokan bangunannya konstruksi bangunan kebikinnya bolé nyampurin batu kali, batu karang, remukan batu bata nyang digabrekin paké campuran kapur ama pasir.[5]
Paranan
[permak | permak sumber]- 1 2 3 "Peninggalan Bangsa Portugis Bernama Benteng Tolukko". indonesiawonder.com. Dipungut 6 Juni 2014.16.00.
{{cite web}}: Check date values in:|accessdate=(pertulungan)[permanent dead link] - 1 2 "Menelusuri Jejak Sejarah, Benteng Tolukko Ternate". sigmanews.co.id. Dipungut 6 Juni 2014.17.00.
{{cite web}}: Check date values in:|accessdate=(pertulungan)[permanent dead link] - ↑ "Benteng Tolukko, Saksi Penjajahan Portugis Terhadap Cengkih". travel.okezone.com. Dipungut 6 Juni 2014.17.00.
{{cite web}}: Check date values in:|accessdate=(pertulungan) - ↑ "Benteng Tolukko Dengan Kisah Sejarah Indah Di Baliknya". Indonesia Kaya. 2013. Dipungut 2023-10-14.
- 1 2 3 4 "Menelusuri Jejak Sejarah, Benteng Tolukko Ternate". sigmanews.co.id. Dipungut 6 Juni 2014.17.00.
{{cite web}}: Check date values in:|accessdate=(pertulungan)[permanent dead link]