Bèk
Bèk[1] (hurup Arap gundul: بيک; Welanda: wijkmeester) atawa lurah ntu dia orang nyang mimpin, ngatur, ama ngejalanin belèd di atu kelurahan (Welanda: wijk). Ni bèk dia kerjanya di bawah wedana (camat) nyang ngurus atu kecamatan (Welanda: onderdistrik).[2] Wayah gini bèk dipilih ama bupati atawa walikota liwat usul sekretaris daerah, abis ntu juga dia jadi pegawé negeri ama punya tanggung jawab ke bupati atawa walikota.[3]
Sejarah
[permak | permak sumber]Di Betawi, dulu pas jaman penjajahan, nyang ngatur siapa aja nyang bisa jadi bèk ntu pemerintah Welanda. Milihnya liwat itung-itungan kelurahan mana aja nyang lebih banyak kaum nyang ngedeprok di atu kelurahan. Kalo ntu lebih banyak orang Arabnya, diangkat ntu orang Arab jadi bèk, gitu juga buat orang Cina ama Betawi.[2]
Nyang kesohor dulu bèk-bèknya ntu ada H.M. Said nyang jadi bèk Tenabang pas jaman penjajahan Nipong. Selaen ntu juga ada bèk Murad alias Abdul Murad nyang jadi bèk Karet, terus juga ada bèk Hasan, bèk Ali, ama bèk Maum. Sangking kesohornya ntu bèk Murad, gang tempat dia tinggal namanya ampè jadi Gang Bèk nyang tempatnya di Karet Depan, kira-kira di belakang Metropolitan punya gedongan, di Jalan Jenderal Sudirman.[2]
Ruju'an
[permak | permak sumber]- ↑ Chaer, A. (2009). Kamus Dialek Jakarta: Edisi Revisi. Masup Jakarta. "Bèk I lurah (pada masa penjajahan Belanda)."
- ↑ a b c Chaer, A. (2017). Tenabang Tempo Doeloe. Masup Jakarta.
- ↑ Setyawan, D. (11 Maret 2023). Perbedaan Kepala Desa dan Lurah Menurut Undang-undang. Tirto.id, senggetan: https://tirto.id/perbedaan-kepala-desa-dan-lurah-menurut-undang-undang-gBVf Diakses pada 14 Oktober 2025, Pukul 10.55 WIB.