Ayam tuturuga

Ayam tuturuga

Ayam tuturuga entu panganan kuliner khas Minahasa, Sulawesi Utara. Hidangan ini dibikin deri ayam nyang dimasak pake bumbu dasar kuning ama santen nyang dimasak sampe empuk bener ama mateng. Kalo diliat-liat, ayam tuturuga emang rada mirip ama opor ayam, mangkannya sering dibilang opor khas Manado di urusan dapur lokal.

Orang kata tuturuga asal-muasalnya ngerujuk ke masakan tradisional Minahasa nyang make daging penyu jadi bahan gacoannya. Kata tuturuga asalnya deri bahasa Manado nyang artinye penyu, dapet nyerep deri bahasa Portugis tartaruga. Deri dulunya, masakan tuturuga nyang bahan dasarnya daging penyu emang udah kesohor di banyak tempat Indonesia bagian timur, kayak Sulawesi Utara, Sulawesi Tengah, Maluku, ama Papua. Hari gini make daging penyu untuk masakan udah disetop, kaga dibolehin lantaran penyu udah ditetepin jadi hewan nyang dilindungin ama Pemerintah Indonesia. Kementerian Kelautan dan Perikanan ngelarang segala macem penangkepan, pemakean, ama jual-beli penyu barengan ama barang-barang turunannya. Pas udah dilarang, masyarakat akhirnya ganti bahan utama masakan tuturuga pake jenis daging laen, nah daging ayam deh nyang paling lumbrah dipake. Jaman sekarang, ayam tuturuga disajiin kaga pake daging penyu lagi ama udah dikenal jadi masakan bahan dasar ayam. Masakan ini biasanya dikeluarin pas ada acara-acara khusus, kayak kumpul keluarga atau perayaan adat Minahasa, termasuk acara pengucapan syukur.